ಮನೆ ಅಂದ ಮೇಲೆ ಮಾತು ಬರುತ್ತೆ ಹೋಗುತ್ತೆ . ಸಣ್ಣ ಮಾತುಗಳು ಅತ್ತೆ ಸೊಸೆಯರ ನಡುವೆ ಇದ್ದೆ ಇರುತ್ತದೆ ..ಅದಕ್ಕೆ ನಮ್ಮ ಮನೆಯೂ ಹೊರತಲ್ಲ...ಬಹಳಷ್ಟು ಸಾರಿ ನಾವು ಮೂರೂ ಜನ ಸೊಸೆಯಂದಿರು ಅಯ್ಯೋ ಅವರ ಬುದ್ದಿ ಗೊತ್ತಲ್ಲ ಮತ್ತ್ಯಾಕೆ ಹೆಚ್ಚು ತಲೆ ಕೆಡಿಸಿಕೊಳ್ಳೋದು ಅಂತ ಸುಮ್ಮನಾಗಿ ಬಿಡ್ತೀವಿ , ಆದ್ರೂ ಕೆಲವೊಮ್ಮೆ ಮನಸ್ಸಿನ ಪರಿಸ್ಥಿತಿಗೆ ಅನುಗುಣವಾಗಿ ಕೆಲವೊಮ್ಮೆ ವಯಸ್ಸಿಗೆ ಬಂದ ಮಕ್ಕಳಿರುವ ನಾವು ಅನಿಸಿಕೊಳ್ಳೋದಾ ಅನ್ನೋ ಸಿಟ್ಟಿಗೆ ಏನಾದ್ರು ಅಂದು ಬಿಡೋದು ಉಂಟು . ಮೊನ್ನೆ ಅತ್ತೆ ಬಂದಿದ್ರು ಏನೋ ಸಣ್ಣ ಪುಟ್ಟ ಮಾತುಗಳು ಬಂದ್ವು ಅಲ್ಲಿ ಅಂತ ಬೇಸರಗೊಂಡಿದ್ದರು.. ಅವರಮ್ಮನಿಗೆ ಒಂದಷ್ಟು ಸಮಾಧಾನ ಬುದ್ದಿ ಹೇಳಿದ ಮೇಲೆ , ಅತ್ತೆ ಮಲಗಲು ಹೋದ ಮೇಲೆ ಮಂಜು ಹೇಳಿದ್ರು "ಅವ್ರ ಕಥೆ ಗೊತ್ತಲ್ವ ಸುನಿ ನಿನಗೆ.. ೨೫ ವರ್ಷದಿಂದ ನೋಡ್ತಾನೆ ಬಂದಿದ್ದೀಯ, ನಿಮ್ಮ ಮೂರು ಜನರ(ವಾರಗಿತ್ತಿಯರು) ಬಗ್ಗೆ ಒಂದ್ ಮಾತು ಇಲ್ಲ .. ನಮಗೆಲ್ಲ ತಾಯಂದಿರು ನೀವು...'
ಹಾಗೆ ಮಾತಾಡ್ತಾ ಮಾತಾಡ್ತಾ .... 'ದಿನಾ ಅದೇ ಬಾವಿಯಲ್ಲಿ ನೀರ್ ತೆಗಿತಾ ಇದ್ರೆ ಬಾವಿಯ ಆಳ ಗೊತ್ತಿರುತ್ತದೆ ಕಣಮ್ಮ! ಹಗ್ಗ ಇಷ್ಟಕ್ಕೆ ನಿಂತರೆ ಬಿಂದಿಗೆ ಮುಳುಗುತ್ತೆ ,ನೀರು ಸಿಗ್ತದೆ ಅಂತ ! ಹೊಸದಾಗಿ ಬಾವಿ ಹತ್ರ ಬಂದವ್ರಿಗೆ ನೀರಿನ ಆಳ ತಿಳಿಯೋದಿಲ್ಲ ! ನೀನೂ ತಿಳ್ಕೋ ಬದುಕೋದು ಹೇಗೆ ಅಂತ !! ನಿನ್ ಮಕ್ಕಳು ನಿನ್ನನ್ನ ಹುಟ್ಟಿದಾಗಿಂದ ನೋಡಿರ್ತಾರೆ. ನೀ ಬೇಸರಗೊಂಡು ಮಾತಾಡಿದ್ರೆ ನಿನ್ ಮಕ್ಕಳಿಗೆ ನಮ್ಮಮ್ಮ ಹಿಂಗೆ ಅಂತ ಗೊತ್ತಿರುತ್ತೆ ಆದ್ರೆ ಸೊಸೆ ಅಥ್ವ ಅಳಿಯ ನಿನ್ನ ಆಗಷ್ಟೇ ನೋಡ್ತಾ ಇರ್ತಾರೆ, ಅವ್ರು ಬೇರೆ ಕಡೆಯಿಂದ ಬಂದು ನಿನ್ನ ಮನೆಗೆ ಸೇರ್ತಾರೆ... ಮಾತಾಡುವಾಗ ಸ್ವಲ್ಪ ತಡೆದು ಮಾತನಾಡು.. ಅಷ್ಟರಲ್ಲಿ ನಿನಗೇ ಗೊತ್ತಾಗಿರುತ್ತೆ ಆ ಮಾತು ಅಗತ್ಯನಾ ಇಲ್ವಾ ಅಂತ .. 'ನನ್ನ' ಮನೆ ಇದು 'ಹೀಗೆ' ಇರಬೇಕು ಅಂತ ಅನ್ಕೊಬೇಡ..!!! ನಿನ್ನ ಕಾಲ, ನಿನ್ನ ಬದುಕು, ನೀ ಬದುಕ ನೋಡೋ ರೀತಿಯಲ್ಲೇ ಎಲ್ಲಾರೂ ನೋಡಬೇಕು ಅಂದಾಗಲೇ ಇದೆಲ್ಲ ಬರೋದು.... ಅಂತೆಲ್ಲ ಹೇಳ್ತಾ ಹೋದ್ರು !!! "ಅಯ್ಯೋ ಶಿವ, ಒಂದ್ ಪುಸ್ತಕ ಓದೋದಿಲ್ಲ(ಓದಿಲ್ಲ) ಆದ್ರೂ ಈ ಪಾಟಿ ಬುದ್ದಿ ಎಲ್ಲಿರುತ್ತೋ ಕಾಣೆ'!!!
ಮನಸ್ಸು ಒಮ್ಮೆಮ್ಮೆ ಮಳೆಯ ನಂತರ ಮೂಡೋ ಕಾಮನಬಿಲ್ಲಿನ ಚಿತ್ತಾರದ ಬಾನಿನಂತೆ... ಪಾಠ ಕಲಿಯೊದಕ್ಕೆ ಪುಸ್ತಕವೇಕೆ ಇಂತಹ ಜೀವದ ಗೆಳೆಯನಿದ್ದರೆ ಅನ್ನೋ ಹಾಗೆ :))))

ಪುಟ್ಟಿ ಈ ಬಾರಿ SSLC ಪರೀಕ್ಷೆ ಬರಿತಾ ಇದ್ದಾಳೆ. ಕೂಸು ಹುಟ್ಟೋ ಮೊದಲು ಕುಲಾವಿ ಅನ್ನೋ ಹಾಗೆ ಇನ್ನು ಪರೀಕ್ಷೇನೆ ಆಗಿಲ್ಲ ಆಗ್ಲೆ ಅವಳಿಗೆ ಯಾವ ಕಾಲೇಜ್ ಸೇರಬೇಕು ಅನ್ನೋ ಯೋಚ್ನೆ ! ಮೈಸೂರಲ್ಲಿ ಕಾಲೇಜ್ಗೆ ಬರವೇ ? ಅವಳಿಗೆ coed ಕಾಲೇಜ್ ಇಷ್ಟ ಅಂದ್ಲು . ಮನೆಗೆ ಹತ್ತಿರ ಇರೋ ಕಾರ್ತಿ ಓದಿದ ಕಾಲೇಜ್ಗೆ ಸೇರಿಸಿದರೆ ಆಯ್ತು . ಅದಕ್ಕ್ಯಾಕೆ ಅಷ್ಟು ಟೆನ್ಶನ್ . ಓದೊ ಹುಡುಗಿ ಎಲ್ಲಿದ್ದರೂ ಓದ್ತಾಳೆ ಅನ್ನೋದು ನನ್ನ ವಿಚಾರ. ಈಗೊಂದಷ್ಟು ದಿನಗಳಿಂದ ಇದ್ದಕ್ಕಿದ್ದ ಹಾಗೆ ನಾನು ಆಳ್ವಾಸ್ಗೆ ಸೇರ್ಕೊಳ್ತಿನಿ ಅಂತ ಹೊಸ 'ರಗಳೆ' ಶುರು ಮಾಡಿದ್ಲು !! ಮಂಜು ನಾನು ಇಬ್ರೂ 'ಅದೆಲ್ಲ ಬೇಡ ಮಗ ಅಷ್ಟ್ ದೂರ ಯಾಕೆ .... ಮೊದ್ಲು ಪರೀಕ್ಷೆ ಮುಗಿಸು etc etc ಅಂತೆಲ್ಲ ಹೇಳ್ತಾನೆ ಇದ್ವಿ . ನೆನ್ನೆ ಸಂಜೆ ಕೂಡ ಶಾಲೆಯಿಂದ ಬಂದ್ ಮೇಲೆ ರಗಳೆ ಶುರು ಮಾಡಿದ್ಲು. ಆಗಷ್ಟೆ ಕಾರ್ತಿ ಕೂಡ ಬಂದ . 'ನೋಡ್ ಮಗ ಇವಳ ಹಠ ' ಅಂದೆ .
'ಲೇ ಪುಟ್ಟಿ, ನೀ ಮೆಡಿಸಿನ್ ಮಾಡ್ತೀಯ (ಅವಳಿಗೆ MBBS ಇಷ್ಟ ಇಲ್ಲ )? ಇಲ್ಲ ತಾನೇ ? AIISH ಸೇರ್ತೀಯ? ಇಲ್ಲ ತಾನೇ ? ಇಂಜಿನಿಯರಿಂಗ್ ಮಾಡ್ತೀಯ ? ಇಲ್ಲ ತಾನೇ ? ಮತ್ಯಾಕೆ ಅಷ್ಟ್ ಹಿಂಸೆ ಪಟ್ಕೊಂಡು ಎಲ್ಲರನ್ನ ಬಿಟ್ಟು ಅಷ್ಟ್ ದೂರ ಹೋಗಿ ಇರೋಕೂ ಆಗದೆ ಬಿಡೋಕೂ ಆಗದೆ ಪರದಾಡ್ತೀಯ ? ಇಲ್ಲೇ ಓದಿದ್ರು ನೀ ಸೇರೋ ಕೋರ್ಸ್ಗೆ ಜಾಸ್ತಿ ಆಗಿ ಮಿಕ್ಕೋ ಅಷ್ಟು ಮಾರ್ಕ್ಸ್ ನಿನಗೆ ಬರುತ್ತೆ!! ಈಗಿನ ಸ್ಟ್ಯಾಂಡರ್ಡ್ ಆಯಸ್ಸು ೬೦ ವರ್ಷ ಈಗ್ಲೆ ೧೫ ವರ್ಷ ಆಗ್ಹೊಯ್ತು ! ಆರಾಮಾಗಿ ಎಲ್ಲರ ಜೊತೆ ಇದ್ದು , ಇಲ್ಲೇ ಓದಿ , ಅಮ್ಮ ಮಾಡ್ಹಾಕಿದ್ದು(!!) ತಿಂದು, ಅಪ್ಪನ್ನ ರೇಗಿಸ್ತಾ ,ಒಂದಷ್ಟು ಹುಡುಗರ ಗೋಳಾಡಿಸಿ,ಇಷ್ಟದ ಕೋರ್ಸ್ ಮಾಡ್ಕೊಂಡು , ಒಂದಷ್ಟು ದಿನ ನಿನಗೆ ಬರೋ ಸಂಬಳ ಎಂಜಾಯ್ ಮಾಡಿ ಆರಾಮಾಗಿರು ..ನಾವೆಲ್ಲಾ ಇಲ್ಲೇ ಗೂಟ ಹೊಡ್ಕೊಂಡಿರಲ್ಲ ಕಣ್ ಪುಟ್ಟಿ !!! ಮೆಡಿಸಿನ್ ಅಥವ ಆಯುಶ್ ಸೇರೋ ಹಾಗಿದ್ರೆ ನಾನೇ ಅಪ್ಪ ಅಮ್ಮನ್ನ convince ಮಾಡ್ತೀನಿ ಆಳ್ವಾಸ್ ಸೇರಿಸೋಕೆ!! "
ನಾವ್ ಹತ್ ಸಾರಿ ಹೇಳಿದ್ರು ಅರ್ಥ ಮಾಡಿಕೊಳ್ಳದ ಮಹರಾಯ್ತಿ 'ಲೋ ಕಾರ್ತಿ , ಈ ಅಪ್ಪ ಅಮ್ಮ ಹಿಂಗೆಲ್ಲ ಹೇಳ್ಲೇ ಇಲ್ಲ ಕಣೋ!! ಹೌದಲ್ವ ನೀ ಹೇಳೋದು !!" ಅಂದ್ಲು
ಮಂಜು ಮಗ ಹೇಳಿದ ರೀತಿಗೆ ಪೂರ ಫಿದಾ 'ನನ್ ಮಗ ಮಂಡ್ಯ ಸೇರಿದ ಮೇಲೆ ಎಷ್ಟು ಜಾಣ ಆದ ಅಲ್ವ... ಎಷ್ಟೇ ಆಗಲಿ ನನ್ ಮಗ ಅಲ್ವ !!'
ಇದಕ್ಕೇನು ಕಮ್ಮಿ ಇಲ್ಲ ಅಪ್ಪ ಮಕ್ಕಳು ... ಎಷ್ಟೇಆಗಲಿ ಹೆತ್ತೋರಿಗೆ ಹೆಗ್ಗಣ ಕೂಡ ಮುದ್ದೆ ಅಲ್ವೇ